2Ch 32 | Ndebele | STEP | Emva kwalezizenzo zobuqotho uSenakheribi inkosi yeAsiriya wafika wangena koJuda, wamisa inkamba maqondana lemizi ebiyelweyo eqonde ukuzifohlelela yona .

2 Chronicles 32

Ukuhlaselwa kwelizwe lakoJuda nguSenakheribi

1 Emva kwalezizenzo zobuqotho uSenakheribi inkosi yeAsiriya wafika wangena koJuda, wamisa inkamba maqondana lemizi ebiyelweyo eqonde ukuzifohlelela yona ^a. 2 UHezekhiya esebonile ukuthi uSenakheribi usefikile lokuthi ubuso bakhe bukhangele impi emelene leJerusalema, 3 wacebisana lezinduna zakhe lamaqhawe akhe ukuvimba amanzi emithombo eyayingaphandle komuzi; basebemsiza. 4 Kwasekubuthaniswa abantu abanengi, abavimba yonke imithombo lesifula esasigeleza phakathi kwelizwe, besithi: Kungani amakhosi eAsiriya ezafika afice amanzi amanengi ^b. 5 Waseziqinisa, wakha umduli wonke owawudilikile, wawukhweza emiphotshongweni, lomunye umduli ngaphandle ^c; waqinisa iMilo emzini kaDavida ^d; wenza lezikhali lezihlangu ngobunengi. 6 Wasebekela abantu induna zezimpi, wazibuthanisela bona egcekeni lesango lomuzi, wakhuluma kunhliziyo yabo esithi: 7 Qinani lime isibindi ^e; lingesabi lingatshaywa luvalo phambi kwenkosi yeAsiriya laphambi kwexuku lonke elilayo ^f; ngoba kukhona kithi omkhulu kulaye ^g. 8 Kuye kulengalo yenyama ^h, kodwa kithi kuleNkosi uNkulunkulu wethu ukusisiza lokulwa izimpi zethu ⁱ. Abantu basebeseyama phezu kwamazwi kaHezekhiya inkosi yakoJuda.

9 Emva kwalokho uSenakheribi inkosi yeAsiriya wathuma inceku zakhe eJerusalema (kodwa yena wayephambi kweLakishi lawo wonke amandla akhe elaye) kuHezekhiya inkosi yakoJuda lakuJuda wonke oseJerusalema ^j, esithi: 10 Utsho njalo uSenakheribi inkosi yeAsiriya ^k: Lithembeni ukuthi lihlale ekuvinjezelweni eJerusalema ^l? 11 UHezekhiya kalikhohlisi yini ukuthi alinikele ukuthi life yindlala langokoma ^m esithi: INkosi uNkulunkulu wethu izasikhulula esandleni senkosi yeAsiriya ⁿ? 12 Kasuye yini lo uHezekhiya owasusa indawo zayo eziphakemeyo lamalathi ayo, watshela uJuda leJerusalema esithi: Lizakhonza phambi kwelathi elilodwa, litshise impepha kulo ^o? 13 Kalazi yini engakwenzayo mina labobaba kubo bonke abantu bamazwe? Onkulunkulu bezizwe zalawomazwe babelakho lokuba lakho yini ukukhulula amazwe abo esandleni sami ^p? 14 Nguwuphi kubo bonke onkulunkulu balezozizwe obaba abazitshabalalisayo owaba lakho ukukhulula abantu bakhe esandleni sami, ukuthi uNkulunkulu wenu abe lakho ukulikhulula esandleni sami ^q? 15 Ngalokho-ke uHezekhiya kangalikhohlisi ^r, kangaliduhisi ngokunjalo, lingamkholwa; ngoba kakho unkulunkulu owasiphi isizwe lombuso owaba lakho ukukhulula abantu bakhe esandleni sami lesabobaba. Laye sibili uNkulunkulu wenu kayikulikhulula esandleni sami yini? ^s 16 Inceku zakhe zatsho lokunye zimelene leNkosi uNkulunkulu njalo zimelene loHezekhiya inceku yayo ^t. 17 Wabhala lezincwadi zokuthuka iNkosi uNkulunkulu kaIsrayeli lokukhuluma zimelene layo ^u zisithi: Njengabonkulunkulu bezizwe zalawomazwe abangakhululanga abantu babo esandleni sami, ngokunjalo uNkulunkulu kaHezekhiya kayikukhulula abantu bakhe esandleni sami ^v. 18 Zasezimemeza ngelizwi elikhulu ngesiJuda ebantwini beJerusalema ^w ababephezu komduli ukubethusa lokubahlupha ukuze ziwuthumbe umuzi ^x. 19 Zasezikhuluma ngoNkulunkulu weJerusalema ^y njengabonkulunkulu bezizwe zomhlaba, umsebenzi wezandla zomuntu ^z. 20 Kodwa uHezekhiya inkosi ^aa loIsaya umprofethi indodana kaAmozi ^ab bakhuleka ngenxa yalokhu, bakhala emazulwini.

Ukukhululwa kwelizwe lakoJuda

21 INkosi yasithuma ingilosi eyaquma wonke amaqhawe alamandla labaphathi lezinduna enkambeni yenkosi yeAsiriya ^ac. Ngakho yabuyela elizweni layo ilobuso obulenhloni. Isingenile endlini kankulunkulu wayo, abaphuma emathunjini ayo bamenza wawa lapho ngenkemba ^ad. 22 Ngokunjalo iNkosi yamsindisa uHezekhiya labahlali beJerusalema esandleni sikaSenakheribi inkosi yeAsiriya lesandleni sabo bonke; yasibakhokhela inhlangothi zonke. 23 Abanengi basebeletha izipho eNkosini eJerusalema ^ae, lezinto eziligugu kuHezekhiya inkosi yakoJuda; wasephakanyiswa emehlweni ezizwe zonke emva kwalokhu ^af.

Ukugula kukaHezekhiya

24 Ngalezonsuku uHezekhiya wagulela ukufa; wasekhuleka eNkosini ^ag; yasikhuluma laye yamnika isibonakaliso ^ah. 25 Kodwa uHezekhiya kabuyiselanga njengokwenzuzo ayeyenzelwe ^ai, ngoba inhliziyo yakhe yayiphakeme ^aj. Ngakho kwaba lolaka phezu kwakhe laphezu kukaJuda leJerusalema ^ak. 26 Kodwa uHezekhiya wazithoba ngenxa yokuphakama kwenhliziyo yakhe ^al, yena labahlali beJerusalema; ngakho ulaka lweNkosi kalwehlelanga phezu kwabo ensukwini zikaHezekhiya ^am.

Inkosi yeBhabhiloni ithuma izithunywa kuHezekhiya

27 Njalo uHezekhiya wayelenotho lodumo kakhulukazi, wazenzela iziphala zesiliva lezegolide lezamatshe aligugu lezamakha lezezihlangu lezezinto zonke eziloyisekayo. 28 Leziphala zesivuno samabele lewayini elitsha lamafutha ^an, lezibaya zenhlobo zonke zezifuyo, lezibaya zemihlambi ^ao. 29 Wazenzela lemizi, lemfuyo yezimvu lenkomo ngobunengi, ngoba uNkulunkulu wayemnikile impahla enengi kakhulu. 30 UHezekhiya lo ^ap wasevimba umthombo wamanzi ^aq angaphezulu eGihoni ^ar, wawaqondisa ehla ngentshonalanga komuzi kaDavida. UHezekhiya waphumelela kuyo yonke imisebenzi yakhe.

31 Kodwa kwakunjalo, mayelana lezithunywa zeziphathamandla zeBhabhiloni, ezathumela kuye ^as ukubuza ngesibonakaliso esenzakalayo elizweni ^at, uNkulunkulu wamtshiya ukuze amhlole ukuthi azi konke okusenhliziyweni yakhe ^au.

Ukufa kukaHezekhiya

32 Ezinye-ke zezindaba zikaHezekhiya lomusa wakhe, khangela, kubhaliwe embonweni kaIsaya umprofethi indodana kaAmozi ^av, egwalweni lwamakhosi akoJuda lawakoIsrayeli ^aw. 33 UHezekhiya waselala laboyise; basebemngcwabela kweliphezulu kakhulu lamangcwaba amadodana kaDavida; uJuda wonke labahlali beJerusalema basebemenzela inhlonipho ekufeni kwakhe ^ax. UManase indodana yakhe wasesiba yinkosi esikhundleni sakhe.